KESI ZA UBAKAJI KASKAZINI UNGUJA

MKOA WA KASKAZINI UNGUJA

JUMLA YA KESI THELATHINI NA SITA ZA UBAKAJI ZIMERIPOTIWA KUTOKEA KATIKA MKOA WA KASKAZINI UNGUJA KATIKA KIPINDI CHA MWAKA JANA.

AKIZUNGUMZA NA ADHANA FM REDIO KAMISHNA MSAIDIZI WA POLISI HASSAN MSANGI AMESEMA BADO TATIZO HILO LIMEKUWA LIKIENDELEA KUTOKANA NA MWAMKO MDOGO WA WANANCHI WA KURIPOTI TATIZO HILO.

AIDHA AMEFAHAMISHA KUWA JESHI LA POLISI KWA KUSHIRIKIANA NA WADAU MBALI MBALI WAMEKUWA WAKIENDELEA KUIELIMISHA JAMII JUU YA UMUHIMU WA KURIPOTI MATENDO YA UDHALILISHAJI WA KIJINSIA.

SAMBAMBA NA HAYO AMEWATAKA WANANCHI WAWE TAYARI KUTOA USHIRIKIANO KATIKA KUTOA USHAHIDI PINDI WANAPOTAKIWA KUFANYA HIVYO ILI WAWEZE KUTOKOMEZA TATIZO HILO KATIKA MKOA HUO.

WIZARA ZA ELIMU TZ ZAKUTANA

WILAYA YA MAGHARIBI

 

WIZARA YA ELIMU NA MAFUNZO YA AMALI ZANZIBAR NA WIZARA YA ELIMU NA MAFUNZO YA UFUNDI TANZANIA BARA ZIMEKUTANA LEO KUJADILI MATOKEO YA KIDATO CHA NNE

 

AKIFUNGUA MKUTANO HUO WAZIRI WA ELIMU NA MAFUNZO YA AMALI ZANZIBAR MHESHIMIWA ALI JUMA SHAMUHUNA OFISINI KWAKE MAZIZINI ,AMESEMA KIKAO HICHO KINA LENGO LA KUJADILI UDANGANYIFU KATIKA MITIHANI HIYO KWA MWAKA HUU KAMA IMEPUNGUA AU LA A.

 

AIDHA AMESEMA KUWEPO KWA UTARATIBU WA KUKUTANA KILA MWAKA KUMESAIDIA KUPIGA HATUA KUBWA YA MASHIRIKIANO KATIKA SWALA LA ELIMU.

 

NA WAZIRI WA ELIMU NA MAFUNZO YA UFUNDI WA TANZANIA BARA DK SHUKURU KAWAMBWA AMESEMA KIKAO HICHO KITAJADILI ELIMU YA SEKONDARI NA YA MSINGI PAMOJA NA KUCHUNGUZA KASORO NA KUZIJADILI.

 

KIKAO HICHO NI CHA SIKU MOJA NA NI MARA YA PILI KUFANYIKA HAPA ZANZIBAR.

ZANZIBAR NA JAPAN

SERIKALI YA JAPAN IMESEMA ITAENDELEA KUSHIRIKIANA NA ZANZIBAR KATIKA JITIHADA ZAKE ZA KUJIKWAMUA KIUCHUMI, KWA KUENDELEA KUCHANGIA MIRADI YA MAENDELEO IKIWEMO YA MAJI SAFI NA SALAMA, MIJINI NA VIJIJINI.

NAIBU WAZIRI WA MAMBO YA NJE WA JAPAN BW. NORIO MITSUYA AMEELEZA HAYO WAKATI AKIZUNGUNGUMZA NA MAKAMU WA KWANZA WA RAIS WA ZANZIBAR MHE. MAALIM SEIF SHARIF HAMAD, OFISINI KWAKE MIGOMBANI.

AMESEMA JAPAN NA ZANZIBAR ZINA UHUSIANO WA KIUCHUMI WA MUDA MREFU, NA KWAMBA UMEKUWA UKIIMARIKA SIKU HADI SIKU KUTOKANA NA NIA NJEMA YA NCHI HIZO.

BW. MITSUYA AKIONGOZA UJUMBE WA WATU SABA WA JAPAN, AMETAJA MAENEO MENGINE WANAYOWEZA KUSHIRIKIANA NA ZANZIBAR KUWA NI PAMOJA NA SEKTA YA KILIMO, UVUVI, UTALII PAMOJA NA KUWAJENGEA UWEZO VIJANA WASIOKUWA NA AJIRA.

AKIZUNGUMZIA KUHUSU SEKTA YA UTALII, AMESEMA WATALII KUTOKA JAPAN WAMESHAJIIKA KUITEMBELEA TANZANIA AMBAPO IDADI YA WATALII WA NCHI HIYO IMEONGEZEKA KUTOKA WATALII 4000 HADI 5000 KWA MSIMU ULIOPITA.

NAE MAKAMU WA KWANZA WA RAIS WA ZANZIBAR MHE. MAALIM SEIF SHARIF HAMAD, AMESEMA ZANZIBAR INATHAMINI MISAADA INAYOTOLEWA NA SERIKALI YA JAPAN, NA KUWASHAJIISHA WAWEKEZAJI WA NCHI HIYO KUJA KUWEKEZA ZANZIBAR HASA KATIKA MIRADI YA UJENZI WA HOTELI ZA KISASA.

AIDHA AMEIOMBA NCHI HIYO KUANGALIA UWEZEKANO WA KUCHANGIA UPATIKANAJI WA UMEME WA UHAKIKA ZANZIBAR, ILI KUEPUKA KUTEGEMEA MOJA KWA MOJA NISHATI HIYO KUTOKA TANZANIA BARA.

MAULIDI

ZANZIBAR

 

MAKAMU WA KWANZA WA RAIS WA ZANZIBAR ALHAJ MAALIM SEIF SHARIF HAMAD, AMEWANASIHI WAZAZI NA WALEZI KUTUMIA HEKIMA NA BUSARA KATIKA MALEZI YA WATOTO, ILI KUWAJENGA KATIKA MAADILI MEMA YA DINI YA KIISLAM.

 

AMESEMA WAZAZI NA WALEZI WANA NAFASI KUBWA YA KUREJESHA MAADILI BORA  KATIKA JAMII IWAPO WATAREJESHA UTAMADUNI WA MALEZI YA PAMOJA, KUPENDANA NA KUACHA KUFARAKANA KWA MAMBO YASIYOKUWA YA MSINGI.

 

ALHAJ MAALIM SEIF AMETOA NASAHA HIZO WAKATI AKIZUNGUMZA KATIKA MAULID YA KUSHAREHEKEA KUZALIWA KWA MTUME MUHAMMAD (SAW), YALIYOANDALIWA NA MADRAST IMAN ISLAMIYA YA JANG'OMBE MJINI ZANZIBAR.

 

AMEIPONGEZA MADRASA HIYO KWA MAFANIKIO MAKUBWA ILIYOPATA, IKIWA NI PAMOJA NA KUONGEZA IDADI YA WANAFUNZI KUTOKA 12 MWAKA 1995 HADI 192 MWAKA HUU.

 

AMEAHIDI KUSHIRIKIANA NA MADRASA HIYO KATIKA KUTAFUTA NAMNA YA KUZITATUA KERO ZINAZOWAKABILI ZIKIWEMO UPUNGUFU WA VYUMBA VYA KUSOMEA.

 

KATIKA RISALA YA MADRASA HIYO ILIYOSOMWA NA MWALIMU HASSAN HASSAN (HASANAYNI) WAMESEMA WANAKUSUDIA KUIJENGA UPYA MADRASA YAO YA ZAMANI, ILI KUTOA NAFASI KWA WANAFUNZI ZAIDI KUPATA VYUMBA VYA KUSOMEA, NA KUWAOMBA WAFADHILI KUJITOKEZA KUCHANGIA UJENZI HUO.

ZIARANI INDIA

SERIKALI YA MAPINDUZI YA ZANZIBAR NA CHUO CHA BAREFOOT CHA INDIA ZIMEKUBALIANA KUANZISHA CHUO CHA MAFUNZO YA AMALI KWA WANAWAKE WA ZANZIBAR WAISHIO VIJIJINI.

MAKUBALIANO HAYO YAMEFIKIWA LEO WAKATI RAIS WA ZANZIBAR NA MWENYEKITI WA BARAZA LA MAPINDUZI DK. ALI MOHAMED SHEIN ALIPOTEMBELEA CHUO HICHO HUKO TILONIA, WILAYA YA AJMER KATIKA JIMBO LA RAJASTAN AKIWA KATIKA SIKU YAKE YA PILI YA ZIARA YAKE YA SIKU TISA NCHINI INDIA.

CHINI YA MAKUBALIANO HAYO AMBAYO KWA UPANDE WA SERIKALI YA ZANZIBAR YALISAINIWA NA KATIBU MKUU WIZARA YA KILIMO NA MALIASILI AFFAN OTHMAN MAALIM NA MWANZILISHI WA CHUO CHA BAREFOOT BWANA BUNCKER ROY CHUO HICHO KITATOA MAFUNZO HAYO KWA WANAWAKE WATU WAZIMA ILI KUWAJENGEA UWEZO WAO KITAALUMA NA STADI ZA MAISHA ILI WAWEZE KUPAMBANA NA UMASIKINI NA HATIMAE KUINUA KIWANGO CHAO CHA MAISHA.

CHUO HICHO KITATOA MAFUNZO YA UFUNDI WA UMEME JUA PAMOJA NA MAFUNZO YA UJASIRIAMALI IKIWEMO UTENGENEZAJI WA BIDHAA KAMA CHAKI, MISHUMAA, VYANDARUA NA PEDI ZA WANAWAKE.

AKIZUNGUMZA MARA BAADA YA KUSHUHUDIA UTIAJI SAINI WA MAKUBALIANO HAYO, RAIS WA ZANZIBAR NA MWENYEKITI WA BARAZA LA MAPINDUZI DK. ALI MOHAMED SHEIN ALISEMA KUTIWA SAINI MAKUBALIANO HAYO NI HATUA NYINGINE MBELE KATIKA JITIHADA ZA SERIKALI ZA KUWAJENGEA UWEZO WANAWAKE NA KUPAMBANA NA UMASKINI NCHINI.

AMESEMA KUJENGWA KWA CHUO HICHO KUTATOA FURSA ZAIDI KWA JAMII ZA WATU WA VIJIJNII AMBAO BADO HAWAJAPATA HUDUMA YA UMEME NCHINI KUPATA NISHATI HIYO KWA GHARAMA NAFUU NA KWA WEPESI ZAIDI.

KWA UPANDE WAKE BIBI MEAGAN FALLONE WA CHUO HICHO AMEELEZA KUWA CHUO HICHO KITAKACHOJENGWA ZANZIBAR MBALI YA KUTOA MAFUNZO KWA WANAWAKE WA UNGUJA NA PEMBA KITATOA FURSA PIA KWA WANAWAKE KUTOKA NCHI JIRANI KUJA KUJIFUNZA TAALUMA HIZO CHUO HAPO.

CHUO CHA BAREFOOT AMBACHO KINATOA MAFUNZO MBALIMBALI YA KUWAJENGEA UWEZO WANAWAKE WATU WAZIMA WAKIWEMO WAJANE KUTOKA MAENEO YA VIJIJINI KUTOKA NCHI ZINAZOENDELEA KILIANZISHWA MWAKA 2004.

CHUO HICHO HUCHUKUA WANAFUNZI KUTOKA NDANI NA NJE YA INDIA AMBAPO HIVI SASA KUNA WANAFUNZI KUTOKA NJE 37 AMBAO WANATOKA ZANZIBAR, VISIWA VYA COMORO, TOGO, IVORY COAST, PANAMA, INDONESIA, NEPAL, HONDURUS, BRAZIL, MEXICO NA BELIZE.

KWA UPANDE WA TANZANIA TANGU KUANZISHWA KWAKE MWAKA 2004 HADI SASA JUMLA YA WANAWAKE 29 WAMEPATA MAFUNZO YAO KATIKA CHUO HICHO AMBAPO KUTOKA TANZANIA BARA NI WANAWAKE 18 NA 11 KUTOKA ZANZIBAR AMBAO MIONGONI MWAO NI WANANWAKE WAWILI WALIOPO CHUO HAPO HIVI SASA AMBAO WANATARAJIWA KUMALIZA MAFUNZO YAO MWEZI MACHI MWAKA HUU.

WANAWAKE WANAOPATA MAFUNZO KATIKA CHUO HICHO HURUDI VIJIJINI KWAO AMBAKO HUSIMAMIA SHUGHULI ZA KUSAMBAZA HUDUMA ZA UMEME JUA KUANZIA KUSAMBAZA, KUFANYA MATENGENZO PAMOJA NA KUTENGENEZA BAADHI YA VIFAA VINAVYOTUMIKA KATIKA USAMBAZAJI HUO.

DK. SHEIN ATAMALIZA ZIARA YAKE KATIKA JIMBO LA RAJASTAN LEO MCHANA KWA KUTEMBELEA MAENEO YA HISTORIA YA HAWA MAHAL NA JUMBA LA MAKUMBUSHO LA ALBERT NA BAADAE JIONI ATAONDOKA KWENDA NEW DELHI KUENDELEA NA ZIARA YAKE HAPO KESHO.

KATIKA ZIARA HIYO DK. SHEIN AMEFUATANA NA MKE WAKE MAMA MWANAMWEMA, WAZIRI WA FEDHA OMAR YUSUF MZEE, WAZIRI WA UWEZESHAJI, USTAWI WA JAMII, VIJANA, WANAWAKE NA WATOTO BIBI ZAINAB OMAR MOHAMED, WAZIRI WA BIASHARA NA VIWANDA NA MASOKO NASSOR AHMED MARZUI, NAIBU WAZIRI WA MAMBO YA NJE NA USHIRIKIANO WA KIMATAIFA DK. MAHADHI JUMA MAALIM NA BALOZI WA TANZANIA NCHINI INDIA INJINIA JOHN KIJAZI.

WENGINE KATIKA MSAFARA HUO NI KATIBU MKUU WIZARA YA AFYA MOHAMED SALEH JIDAWI NA KATIBU MKUU KILIMO NA MALIASILI AFFAN OTHMAN MAALIM, MSHAURI WA RAIS USHIRIKIANO WA KIMATAIFA, UWEKEZAJI NA UCHUMI BALOZI MOHAMED RAMIA NA MKURUGENZI MTENDAJI WA MAMLAKA YA UWEKEZAJI ZANZIBAR –ZIPA SALUM KHAMIS

RAIS SHEIN INDIA

4

RAIS WA ZANZIBAR NA MWENYEKITI WA BARAZA LA MAPINDUZI DK. ALI MOHAMED SHEIN ANAONDOKA NCHINI  KUANZA ZIARA YA SIKU TISA NCHINI INDIA KUFUATIA MWALIKO WA MAKAMU WA RAIS WA NCHI HIYO BWANA MOHAMMAD HAMID ANSARI.

AKIWA NCHINI HUMO DK. SHEIN ANATARAJIWA KUKUTANA NA VIONGOZI WA NCHI HIYO NA JUMUIYA ZA WAFANYABIASHARA KWA LENGO LA KUKUZA UHUSIANO KATI YA TANZANIA NA INDIA PAMOJA NA KUHIMIZA USHIRIKIANO KATI YA ZANZIBAR NA INDIA KATIKA NYANJA ZA UCHUMI, BIASHARA, UWEKEZAJI, AFYA, KILIMO NA ELIMU.

KATIKA ZIARA HIYO MBALI NA MKE WAKE MAMA MWANAMWEMA, DK. SHEIN AMEFUATANA NA WAZIRI WA FEDHA OMAR YUSUF MZEE, WAZIRI WA UWEZESHAJI, USTAWI WA JAMII, VIJANA, WANAWAKE NA WATOTO BIBI ZAINAB OMAR MOHAMED, WAZIRI WA BIASHARA NA VIWANDA NA MASOKO NASSOR AHMED MARZUI NA NAIBU WAZIRI WA MAMBO YA NJE NA USHIRIKIANO WA KIMATAIFA DK. MAHADHI JUMA MAALIM.

WENGINE KATIKA MSAFARA HUO NI KATIBU MKUU WIZARA YA AFYA MOHAMED SALEH JIDAWI NA KATIBU MKUU KILIMO NA MALIASILI AFFAN OTHMAN MAALIM, MSHAURI WA RAIS USHIRIKIANO WA KIMATAIFA, UWEKEZAJI NA UCHUMI BALOZI MOHAMED RAMIA NA MKURUGENZI MTENDAJI WA MAMLAKA YA UWEKEZAJI ZANZIBAR –ZIPA SALUM KHAMIS NASSOR.

AKIWA NCHINI INDIA JUMAPILI TAREHE 2 FEBRUARI, 2014 ATATEMBELEA CHUO CHA BAREFOOT KILICHOKO TILONIA AMBAKO SERIKALI YA MAPINDUZI YA ZANZIBAR INATARAJIWA KUSAINI MAKUBALIANO YA USHIRIKIANO NA CHUO HICHO AMBACHO KIMEJIEGEMEZA KATIKA KUWAJENGEA UWEZO KIUCHUMI, KIJAMII NA KIELIMU WANAWAKE WAZEE NA WAJANE WAISHIO VIJIJINI ILI KUINUA KIWANGO CHAO CHA MAISHA.

SIKU INAYOFUATA TAREHE 3 FEBRUARI, 2014 MAPEMA ASUBUHI ATAZURU KUMBUKUMBU YA MAHATMA GHANDHI AMBAKO ATAWEKA SHADA LA MAUA NA BAADAE ATAFANYA MAZUNGUMZO NA MWENYEJI WAKE MAKAMU WA RAIS.

BAADAE MCHANA SIKU HIYO ATAFANYA MAZUNGUMZO NA WAZIRI MKUU WA INDIA BWANA MANMOHAN SINGH, ATAONANA NA WAZIRI ANAYESHUGHULIKIA DIASPORA NA WAZIRI WA AFYA NA FAMILIA WA NCHI HIYO. JIONI ATAKUTANA NA WATANZANIA WANAIOSHI DELHI NA BAADAE USIKU ATAHUDHURIA CHAKULA CHA USIKU KILICHOANDALIWA KWA HESHMA YAKE NA MWENYEJI WAKE MAKAMU WA RAIS WA INDIA.

TAREHE 4 FEBRUARI, 2014 ATATEMBELEA KITUO CHA UTAFITI WA MAZAO YA KILIMO, ATAKUTANA NA JUMUIYA YA WAFANYABIASHARA NA KUONDOA KWENDA MJI WA HYDERABAD AMBAKO SIKU INAYOFUATA ATAKUTANA NA MWENYEKITI WA HOSPILTALI ZA APPOLO NA KUSAIDIA MAKUBALIANO YA USHIRIKIANO.

DK. SHEIN SIKU HIYO ATAKUTANA PIA NA BARAZA LA BIASHARA YA MADAWA NCHI ZA NJE LA INDIA NA BAADAE ATAPATA FURSA YA KUTEMBELEA KIWANDA CHA MADAWA AMBAPO BAADAE ATASAFIRI HADI MJI WA BANGALORE AMBAKO SIKU YA ALHAMISI TAREHE 6 FEBRUARI, 2014 ATATEMBELEA HOSPITALI YA MANIPAL NA KUTIA SAINI MAKUBALINO YA USHIRIKIANO NA HOSPITALI HIYO NA BAADAE KUONDOKA KWENDA MUMBAI.

AKIWA MUMBAI TAREHE 7 FEBRUARI, 2014 DK. SHEIN ATATEMBELEA KAMPUNI YA KUTENGENEZA MATREKTA YA MAHINDRA NA BAADAE JIONI ATAKUTANA NA MAKAMPUNI YA BIASHARA YA UTALII NA WAKALA WA SAFARI ZA KITALII.

JUMAMOSI TAREHE 8 FEBRUARI, 2014 RAIS NA UJUMBE WAKE UTATEMBELEA KIWANDA CHA KUSINDIKA VIUNGO (SPICES).

RAIS WA ZANZIBAR NAMWENYEKITI WA BARAZA LA MAPINDUZI NA UJUMBE WAKE UTAONDOKA INDIA JUMAPILI TAREHE 9 FEBRUARI, 2014 KUREJEA NYUMBANI.

MAALIM SEIF NA WAANDISH

MAKAMU WA KWANZA WA RAIS WA ZANZIBAR MHE. MAALIM SEIF SHARIF HAMAD, AMEWAHIMIZA WAANDISHI WA HABARI KURIPOTI TAARIFA ZINAZOGUSA MAENDELEO YA JAMII HASA KATIKA MAENEO YA VIJIJINI, ILI KUIWEZESHA JAMII KUFAHAMU MAENDELEO NA CHANGAMOTO ZINAZOWAKABILI WANANCHI WA VIJIJINI.

AMESEMA MARA NYINGI WAANDISHI WA HABARI WAMEKUWA WAKIRIPOTI HABARI ZINAZOHUSU MAENDELEO YA MIJINI, NA KUSAHAU MCHANGO UNAOTOLEWA NA WAKAAZI WA VIJIJINI, HALI INAYOPELEKEA MAENEO YA VIJIJINI KUACHWA NYUMA KIMAENDELEO.

MHE. MAALIM SEIF AMETOA INDHARI HIYO WAKATI AKIZUNGUMZA KWENYE MAHAFALI YA TANO YA CHUO CHA UANDISHI WA HABARI NA MAWASILIANO YA UMMA, YALIYOFANYIKA KATIKA VIWANJA VYA WIZARA YA HABARI, MNAZI MMOJA.

AMESEMA MAENEO YA VIJIJINI YANA MIRADI MINGI YA KIUCHUMI NA KIJAMII  INAYOTEKELEZWA KWA NGUVU ZA WANANCHI, SERIKALI NA WASHIRIKA WA MANDELEO, LAKINI MIRADI HIYO IMEKOSA KURIPOTIWA MAENDELEO YAKE NA KUWAFANYA WATEKELEZAJI WAKE KURUDI NYUMA.

AMEFAHAMISHA KUWA VYOMBO VYA HABARI VINA WAJIBU WA KUHAMASISHA MAENDELEO NA UMOJA KATIKA JAMII, NA KUVISHAJIISHA KUELEKEZA NGUVU ZAO KATIKA MAENEO NA SEKTA ZOTE ZA MAENDELEO.

SAMBAMBA NA HILO MAALIM SEIF AMEWATAKA WAANDISHI WA HABARI KUZIFANYIA UTAFITI HABARI WANAZOZIANDIKA, ILI KURIPOTI TAARIFA SAHIHI NA KUEPUKA KUWAPOTOSHA WANANCHI.

AIDHA MAKAMU WA KWANZA WA RAIS AMEWASISITIZA WAHITIMU HAO KUJIENDELEZA KATIKA TAALUMA MAHSUSI (SPECIALIZATION), ILI KUONGEZA UPEO WA KURIPOTI KATIKA MAENEO HAYO.

AMEFAHAMISHA KUWA IWAPO WAANDISHI WATAJIKITIKA KATIKA KURIPOTI KWENYE FANI TOFAUTI ZIKIWEMO AFYA, KILIMO, MAZINGIRA, ELIMU NA UTALII, WATAKUWA NA UFANISI MKUBWA NA KUWEZA KUJIAMINI ZAIDI KATIKA KAZI ZAO.

AMEWASISITIZA KUTUMIA KALAMU ZAO VIZURI KWA KUSAIDIA JUHUDI ZA MAENDELEO, PAMOJA NA KUSAIDIA MAPAMBANO DHIDI YA VITENDO VYA RUSHWA, UDHALILISHAJI WA KIJINSIA, UCHAFUZI WA MAZINGIRA NA MATUMIZI YA DAWA ZA KULEVYA.

AMESEMA SERIKALI KWA UPANDE WAKE ITAENDELEA KUKIJENGEA UWEZO CHUO HICHO CHA UANDISHI WA HABARI KWA KUKIPATIA BAJETI MUAFAKA KADRI HALI YA FEDHA ITAKAVYORUHUSU, ILI KUKIJENGEA MAZINGIRA BORA ZAIDI YA KUFUNDISHA TAALUMA HIYO.

KWA UPANDE WAKE, WAZIRI WA HABARI, UTAMADUNI, UTALII NA MICHEZO MHE. SAID ALI MBAROUK, AMESEMA CHUO HICHO KINA UMUHIMU MKUBWA KWA SEKTA YA HABARI NA MAENDELEO YA TAIFA KWA UJUMLA.

AMESEMA UFANISI UNAOONEKANA KWENYE VYOMBO VYA HABARI BINAFSI, UNATOKANA NA MCHANGO WA CHUO HICHO KUTOA WAHITIMU BORA, AMBAO HUAJIRIWA KUVITUMIKIA VYOMBO HIVYO PAMOJA NA VILE VYA SERIKALI.

AMEONGEZA KUWA KATIKA KUKIJENGEA UWEZO ZAIDI CHUO HICHO, WIZARA YA HABARI IMEKUWA IKISHIRIKIANA KWA KARIBU NA BODI YA CHUO HICHO, KATIKA KUTATUA BAADHI YA KERO ZINAZOKIKABILI, IKIWA NI PAMOJA NA KUWEKA UTARATIBU WA KULIENDELEZA ENEO LA CHUO HICHO LILILOKO TUNGUU.

MWENYEKITI WA BODI YA CHUO HICHO ND. CHANDE OMAR AMEIOMBA SERIKALI KUANGALIA UWEZEKANO WA KUANZISHA VITENGO VYA HABARI KATIKA KILA IDARA YA SERIKALI, ILI KUSAIDIA UPATIKANAJI WA AJIRA KWA VIJANA WANAOHITIMU TAALUMA YA HABARI.

MAPEMA AKISOMA RISALA YA WAHITIMU WA CHUO HICHO, MWANAFUNZI MWAJUMA KHAMIS, AMEIOMBA WIZARA YA HABARI ISHIRIKIANE NA WIZARA YA ELIMU NA MAFUNZO YA AMALI, KUWASAIDIA WANAFUNZI WA TAALUMA YA HABARI, ILI NAO WANUFAIKE NA MIKOPO YA ELIMU YA JUU ZANZIBAR.

JUMLA YA WANAFUNZI 122 WAMEHITIMU MAFUNZO YA CHETI NA STASHAHADA YA UANDISHI WA HABARI KATIKA CHUO HICHO, KATI YAO WAHITIMU 83 WAKIWA WANAWAKE.