UZINDUZI WA MIAKA HAMSINI YA MUUNGANO

RAIS WA ZANZIBAR NA MWENYEKITI WA BARAZA LA MAPINDUZI DK ALI MOHAMED SHEIN AMEWATAKA WATANZANIA KUTAMBUA KUWA KUUNDWA KWA JAMHURI YA MUUNGANO WA TANZANIA NI MATOKEO YA MAKUBALIANO YA WANANCHI WENYEWE CHINI YA VIONGOZI WAASISI WA MUUNGANO HUO MAREHEMU MWALIMU JULIUS NYERERE, RAIS WA JAMHURI YA TANGANYIKA NA MAREHEMU MZEE ABEID AMANI KARUME RAIS WA JAMHURI YA WATU WA ZANZIBAR.

KWA HIYO AMESEMA WANANCHI WANA KILA SABABU YA KUUTETEA, KUULINDA NA KUUNDELEZA NA PIA NI WAJIBU WAO KUJIVUNIA MUUNGANO HUO KWA MANUFAA YA WATU WOTE.

AKIZINDUA MAADHIMISHO YA MIAKA 50 YA MUUNGANO HUKO KWENYE UKUMBI WA SALAMA KATIKA HOTELI YA BWAWANI MJINI UNGUJA LEO, DK. SHEIN AMESEMA MIAKA 50 YA MUUNGANO IMESHUHUDIA MAENDELEO MAKUBWA AMBAYO YAMEMGUSA KILA MWANANCHI.

AMEBAINISHA KUWA KUDUMU KWA MUUNGANO HUO KUNATOKANA NA DHAMIRA ZA DHATI ZA UMOJA WALIOKUWANAO WAASISI WAKE, SERA NZURI ZA VYAMA VYA TANU, AFRO SHIRAZI NA CCM PAMOJA NA JUHUDI ZINAZOENDELEZWA NA VIONGOZI WALIOFUATIA PAMOJA NA KUUNGWA MKONO NA WANANCHI.

ALIONGEZA KUWA MBALI ZA BUSARA ZA WAASISI WA MUUNGANO LAKINI KUMBUKUMBU ZA KIHISTORIA ZA UPANDE WA KIJIOLOJIA NA KIJAMII ZINAONESHA KUWA WATU WA ZANZIBAR NA TANGANYIKA NI WATU WAMOJA HIVYO MUUNGANO WAO SI TUKIO LILILOKUJA BILA SABABU MAALUM.

DK SHEIN ALIWAKUMBUSHA WANANCHI UHUSIANO USIOTENGANIKA KATI YA MAPINDUZI YA ZANZIBAR YA MWAKA 1964 NA MUUNGANO WA TANGANYIKA NA ZANZIBAR ULIASISIWA TAREHE 26 APRILI MWAKA 1964 NA KUSISITIZA KUWA HIZO NDIZO NGUZO KUU KWA MUSTAKABALA WA NCHI.

RAIS WA ZANZIBAR NA MWENYEKITI WA BARAZA LA MAPINDUZI ALIWAELEZA WANANCHI WALIOHUDHURIA HAFLA HIYO KUWA MIAKA 50 YA MUUNGANO IMETOA FURSA KWA WANANCHI WA PANDE ZOTE MBILI KUISHI WAPENDAPO KATIKA JAMHURI YA MUUNGANO WA TANZANIA BILA YA KUBUGHUDHIWA KWA KUWA UHURU HUO UPO NDANI YA KATIBA ZOTE MBILI.

KWA HIYO AMEWATAKA WATANZANIA KUZINGATIA KAULI MBIU YA MAADHIMISHO HAYO AMBAYO NI UTANZANIA WETU NI MUUNGANO WETU,TUULINDE, TUUIMARISHE NA TUUDUMISHE KAULI AMBAYO ALISEMA INATHIBITISHA UMUHIMU WA UTANZANIA WETU.

ALIKIRI KUWA MUUNGANO UMEKUWA NA CHANGAMOTO ZAKE LAKINI ALIELEZA PIA JITIHADA MBALI MBALI AMBAZO ZIMEKUWA ZIKICHUKULIWA KUKABILIANA NA CHANGAMOTO HIZO KWA LENGO LA KUIMARISHA MUUNGANO.

KABLA YA HOTUBA YAKE, DK. SHEIN ALIZINDUA NEMBO YA MAADHIMISHO YA MIAKA 50 KWA KUPONYEZA KITUFE.

AWALI AKIMKARIBISHA RAIS, MAKAMU WA PILI WA RAIS BALOZI SEIF ALI IDDI ALIELEZA MAADHIMISHO YA MIAKA 50 YA MUUNGANO YATAAMBATANA NA SHUGHULI MBALI MBALI ZITAKAZOWASHIRIKISHA WANANCHI KWA NJIA YA MAKANGOMANO, MICHEZO NA BURUDANI NA KUFIKIA KILELE CHAKE TAREHE 26 APRILI,2014 HUKO KATIKA KIWANJA CHA UHURU DAR ES SALAAM.

ALIELEZA PIA KUWA KATIKA MIAKA 50 MALENGO YA MUUNGANO YAMEKUWA YAKITEKELEZWA KWA MAFANIKIO MAKUBWA NA KUELEZA KUWA WATANZANIA HAWANA BUDI KUWASHUKURU WAASISI WA MUUNGANO PAMOJA NA VIONGOZI WALIOFUATIA KWA KUTELEKEZA KWA DHATI AZMA YA MUUNGANO YA KUWALETEA MAENDELEO.

SHEREHE HIZO ZA UZINDUZI ZILIHUDHURIWA PIA NA MAKAMU WA KWANZA WA RAIS MAALIM SEIF SHARIF HAMAD PAMOJA NA VIONGOZI WENGINE WAKIWEMO MAWAZIRI WA SERIKALI YA JAMHURI YA MUUNGANO NA SERIKALI WA MAPINDUZI YA ZANZIBAR.