WATANZANIA WAFANYA UKAHABA CHINA

BEIJING.

Waziri wa Mambo ya nje na Ushirikiano wa Kimataifa wa Jamhuri ya Muungano wa Tanzania Bernard Membe amesema kuwa, mabinti wa Kitanzania wamekuwa wakifanyishwa biashara ya ukahaba huko China.

kiongozi huyo ameyasema hayo alipokuwa akizungumzia masuala mbalimbali yanayohusu wizara yake nchini China na kubainisha kwamba, watoto wa kike wenye umri wa hadi miaka 14 wamekuwa wakifanyishwa biashara ya ukahaba China kutokana na kusafirishwa na baadhi ya Watanzania wasio waaminifu.

 Waziri wa Mashauri ya Kigeni na Ushirikiano wa Kimataifa wa Tanzania amebainisha kwamba, mwezi uliopita alipata mwaliko nchini humo na kubaini kuwapo biashara hiyo katika mji wa Guangzhou. 

 Membe amesema kuwa, kutokana na taarifa hizo, ameitaarifu Wizara ya Mambo ya Ndani kuunda timu kwenda nchini humo na pia kubaini wanaoendesha biashara hiyo kuhakikisha inakomeshwa mara moja.

 Amesema imebainika wapo baadhi ya Watanzania wanakwenda China kwa kutumia hati bandia za kusafiria za nchi nyingine.