wilaya ya micheweni.

 

 

Makamo wa Kwanza wa Rais wa Zanzibar Maalim Seif Sharif Hamad, amepongeza hatua ya Wizara ya Elimu na Mafunzo ya Amali yakuweka mikakati imara ya kukabiliana na matatizo yanayoikabili sekta ya elimu nchini.

 

Maalim Seif ametoa pongezi hizo katika hafla ya uwekaji wa jiwe la msingi katika jengo la madarasa nane la skuli ya msingi Tumbe, ikiwa ni shamra shamra za maadhimisho ya miaka 50 ya Mapinduzi ya Zanzibar.

 

Amesema kuwa hatua hiyo itasaidia kwa kiasi kikubwa kukabiliana na matatizo ya sekta hiyo yakiwemo ya upungufu wa vikalio na vitabu vya kusomea.

 

aidha maalim seif amewapongeza wananchi wa Tumbe na Micheweni kwa moyo wao wa kujitolea, na mwamko walionao katika  kuchangia huduma za elimu.

 

Amesema kuwa kwa kipindi kirefu Wilaya ya Micheweni ilikuwa nyuma katika sekta sekta mbali mbali za maendeleo ikiwemo elimu, na kwamba mwamko unaoonyeshwa na wananchi hao umesababisha watoto wengi zaidi kupata fursa ya elimu.

 

Amewahimiza kushirikiana na walimu katika malezi ya watoto ili kutunza maadili ambayo yanaonekana kuporomoka katika maeneo mbali mbali  nchini, sambamba na kuwalinda dhidi ya marafiki waovu wanaoweza kuwaingiza katika vitendo viovu vikiwemo utumiaji wa madawa ya kulevya.

 

Mapemba akizungumza katika hafla hiyo, Waziri wa elimu na Mafunzo ya Amali Ali Juma Shamhuna, amesema kuwa miongoni mwa mikakati yao ya kutatua kero za elimu ni pamoja kuanzisha miradi ya vitabu vya kusomea ambapo wanafunzi wote hadi darasa la nne watapatiwa vitabu vitano kila mmoja kuanzia mwezi Januari, 2014.