JESHI LA POLISI MKOA WA KUSINI PEMBA LAAHIDI KUSHIRIKIANA NA WAANDISHI HABARI.

PEMBA.

JESHI la Polisi Mkoa wa Kusini Pemba, limesema litaendelea kushirikiana na waandishi wa habari kisiwani Pemba, kwa kutoa habari mbali mbali ambazo jamii inatakiwa ifahamishwe.

Jeshi hilo limesema linamambo mengi ambayo yanatakiwa kuandikiwa makala za Uchambuzi ambayo jamii haiyafahamu, ikiwemo masuaala ya Utii wa sheria bila ya kushurutishwa.

Kauli hiyo imetolewa na kamanda wa Polisi Mkoa wa kusini Pemba, Sheikhan Mohammed Sheikhan, wakati alipokuwa akifungua mafunzo ya siku nne ya uwandishi wa makala kwa waandishi wa habari kisiwani Pemba, yaliyoandaliwa na Pemba Press Club kwa Ufadhili wa UTPC, huko katika ukumbi wa ZAC Chake Chake Pemba.

Alisema fani ya uandishi wa habari ni fani muhimu sana katika kujenga uelewa kwa wananchi katika matukio mbali mbali ya kijamii, kitaifa na hata kimataifa.

“Natambua Mchango wa Tasnia ya Uandishi wa habari katika kuchapuza mauala mbali mbali ya kijamii, kiuchumi na kisiasa, nawaombeni mutumie kalamu zenu vizuri katika kuelimisha jamii”alisema.

Aidha aliwakumbusha waandishi wa habari kwamba habari inaweza kuwa ni silaha ya kupelekea neema au kupeleka maafa katika jamii, itegemea jinsi habari zitakavyotumika vizuri katika kuhimiza mambo ya manufaa.

“Habari yako inawezekana ikawa ni moja ya kuchochea maendeleo kwa wananchi, lakini ukiutumia vibaya itakuwa ni chanzo cha Vurugu jambo ambalo halikubaliki”alisema.

Hata hivyo kamanda Sheikhan aliwataka waandishi wa habari kisiwani Pemba, elimu watakayopatiwa kuitumia vizuri tena kwa vitendo kwa kuweka mikakati ya kuandika makala mbali mbali, hasa za vijijini kwa vile waandishi wengi hawafiki huko.

Akisoma risala ya klabu ya waandishi wa habari Pemba (PPC)katibu wa PPC Khatib Juma Mjaja, alisema PPC imekuwa ikitekeleza shuhuli mbali mbali za kuwajengea uwezo wanachama wake kwa kuwapatia mafunzo kutoka kwa wadau mbali mbali.

Alizitaja miongoni mwa shuhuli za kijamii ambazo zimefanywa ni pamoja na kuendesha na kusimamia miradi ya Ukimwi, madawa ya Kulevya, Afya ya mama na mtoto, Mazingira na miradi mengine mingi.

“Katika kutekeleza Shuhuli zetu tumekuwa hatusimami pekeyetu , lakini tumekuwa tukishirikiana na wadau mbali mbali wa habari ikiwemo UTPC, MCT.

Naye msaidizi katibu wa Klabu ya waandishi wa habari Pemba, Ali Mbarouk Omar alisema mafunzo hayao yatazidisha uweledi na uwelewa kwa waandishi wa habari katika utekelezaji wa kazi zao.

Alilishukuru jeshi la Polisi kwa kuwa mstari wa mbele kushirikiana na waandishi wa Pemba, kwa kuwapatia habari mbali mbali pale wanapozihitaji, pamoja na kutekeleza majukumu yao kikamilifu.

Akitoa shukurani kwa niaba ya waandishi wenzake, mwandishi wa habari mkongwe kisiwani Pemba Ali Khatib Chwaya, waliahidi kufanyia kazi maagizo yote ya Kamanda kwa kuzingatia taaluma yao.

Aliwataka waandishi wenzake kuhakikisha wanaandika makala mbali mbali za uchunguzi ili kwenda sambamba na mafunzo hayo wanayopatia.