PEMBA PRESS CLUB YALAANI KUCHOMWA MOTO HITS FM REDIO UNGUJA.

 PEMBA.

KLABU ya Waandishi wa habari kisiwani Pemba, Pemba Press Club imelaani vikali kitendo cha kuchomwa moto kwa kituo cha Radio cha Hist FM kilichopo Migombani Mjini Unguja hivi karibuni.

PPC imesema wanahabari wa Pemba, hawafurahishwi na vitendo vyovyote vya kuhujumu au vinavyokwaza uhuru wa habari, kwa namna yoyote ile, kwani haki ya habari ni miongoni mwa haki muhimu zinatambuliwa na katiba ya Jamhuri ya Muungano wa Tanzania na katiba ya Zanzibar ya mwaka 1984.

kauli hiyo imetolewa na katibu wa klabu ya waandishi wa habari Pemba, Khatib Juma Mjaja wakati alipokuwa akisoma risala ya PPC, kwa mgeni rasmi katika mafunzo ya siku nne juu ya uwandishi wa makala, huko katika ukumbi wa Tume ya Ukimwi Chake Chake Pemba.

Alisema kitendo hicho kimelenga sio tu kuviza demokrasia ya habari kwa jamii, lakini pia kinakwenda kinyume na katiba zote mbili ya Zanzibar na jamhuri ya muungano wa Tanzania.

Aidha alisema wafanyakazi wa kituo hicho ni watu wenye familia zinazowategemea katika maisha yao ya kila siku, kutokana na tatizo la ajira linalokabili jamii, kuchomwa moto kituo hicho kinasababisha kuongezeka kmwa ukali wa maisha kwa wafanyakazi.

Hata hivyo PPC imeziomba taasisi zinazohusika kulifanyia kazi suala hilo na sheria kuchukuwa mkono wake kwa wale wote watakaobainika mkuhusika na kitendo hicho dhalimu.

Nao baadhi ya waandishi wa habari kisiwani Pemba, walisikitishwa sana na tukio hilo na kudai kuwa tasnia ya habari sasa imeanza kupotea.

Ali Khatib Chwaya mwandishi Mkongwe alilitaka jeshi la Polisi Kuhakikisha inawachukulia hatua kali wote waliohusika na kitendo hicho kwa kuwafikisha kwenye vyombo vya sheria.

“kile ni kitendo cha kinyama na kinapaswa kulaniwa na kila mtu, kinasikitisha sana na kimeweza kurudisha nyuma maisha ya watu, watu wanategemea kuendesha familia zao pale halafu wanakwamishwa na watu wachache”alisema.

Alisema tasnia ya habari imekuwa kihimiza maendeleo ya nchi, ikiwemo vijana kujiajiri wenyewe na kutokutegemea ajira kutoka serekalini, amevitaka vilabu vya habari kuwa mtari wa mbele kukisaidia kituo hicho kwa hali namali.

Kwa upande wake Saidi Mohamed Ali alisema sasa wakati umefika kwa wamiliki wa vyombo vya habari kuwatafutia bima ya maisha wafanyakazi wao, kutokana na matukio ya kuvamiwa kwa vituo vya redio kuendelea kutokea.

“Mungu aliwajaaliwa hawakuweza kumzuru mwandishi aliyekuwemo studio kama wangemdhuru wangekuwa wameshapoteza malengo yake”alisema.

Alisema matukio kama hayo yanaashiria kurudisha nyuma uhuru wa habari, jambo ambalo ni kwenda kinyume na katika za nchi ambazo zimehimiza haki ya kutoa na kupata habari.