WANANCHI WAASWA KUTOKUTUMIA MAENEO YALIYOTENGA NA SERIKALI KWA AJILI YA SHUGHULI ZA MAENDELEO.

 Naibu Waziri wa Afya Mahmoud Thabi Kombo akizungumza na Mkuu wa Mkoa Kusini Unguja Dkt. Idrissa Islam Hija alipofika kuangalia eneo lililotengwa kwa ajili ya ujenzi wa Hospitali ya rufaa Zanzibar katika kijiji cha Binguni Wilaya ya kati Unguja (wakatikati) anaefuatilia mazungumzo hayo ni sheha wa shehia ya Binguni.

 Naibu Waziri wa Afya Mahmoud Thabit Kombo (kushoto) akionyeshwa moja ya mipaka ya eneo lililotengwa kwa ajili ya ujenzi wa Hospitali ya Rufaa Zanzibar, katikati Mkurugenzi wa Upimaji na Ramani Zanzibar Mwalim Mbarouk Hamad na (kulia) Katibu Mkuu Wizara ya Afya Dkt. Saleh Jidawi. Picha na Makame Mshenga-Maelezo Zanzibar.

 Msafara wa viongozi wa Mkoa Kusini Unguja na Wizara ya Afya  wakitembelea eneo la Binguni lenye ukubwa wa ekari 80 linalotarajiwa kujengwa Hospitali ya rufaa Zanzibar.

Mkurugenzi wa Upimaji na Ramani Zanzibar Mwalim Mbarouk Hamad akiwaonyesha viongozi wa Mkoa Kusini Unguja na Wizara ya Afya mchoro wa eneo lililopimwa kwa ajili ya matumizi ya ujenzi wa Hospitali ya rufaa Zanzibar katika kijiji cha Binguni Wilaya ya Kati Unguja. Picha na Makame Mshenga-Maelezo Zanzibar.

Na Ramadhani Ali/Maelezo Zanzibar
                 
Wananchi wanaoishi karibu na eneo lililotengwa kwa ajili ya ujenzi wa Hospitali ya Rufaa katika kijiji cha Binguni, Wilaya ya Kati Unguja , wametakiwa kutolitumia eneo hilo kwa shughuli yeyote ya ujenzi ili kujiepusha na hasara inayoweza kuwapata.
Mkuu wa Mkoa Kusini Unguja Dkt. Idrissa Islam Hija ametoa ushauri huo wakati uongozi wa Wizara ya Afya ukiongozwa na Naibu Waziri wa Wizara hiyo  Mahmoud Thabit Kombo kufanya ziara ya kuliangalia eneo hilo ambapo imebainika baadhi ya wananchi wameanza kulivamia kwa ujenzi wa nyumba za kuishi.
Mkuu wa Mkoa amesema eneo hilo limepimwa rasmi kwa ajili ya matumzi ya Wizara ya Afya hivyo matumizi mengine yeyote yatakayofanywa hayatatambuliwa na uongozi wa Mkoa.
Katika hatua za awali za kulihifadhi eneo hilo, Dkt. Idrissa Islam Hija ameishauri Wizara ya Afya kuanza hatua ya kulizungushia uzio hatua kwa hatua ili wananchi wasipate mwanya wa kulivamia.
Amesema wananchi wamekuwa watukutu katika kufuata sheria za nchi na kila wanalofanya hudhani ni haki yao   licha ya hatua za  kuwaelimisha na kuwazuilia kuchukuliwa.
Aidha amewataka masheha na madiwani wa eneo hilo kutotowa vibali vinavyowaruhusu wananchi kujenga kwani uzoefu unaonyesha  watu wanaovamizi  maeneo kwa kujenga nyumba hupatiwa vibali na masheha ama madiwani.
“Madiwani na Masheha hamuruhusiki kutoa vibali vya  matumizi ya ardhi na kufanya hivyo ni kosa jiepusheni na tabia hiyo hasa katika eneo hili lilitengwa kwa ajili ya shughuli za Serikali,” alisisitiza Mkuu wa Mkoa.
Naibu Waziri wa Afya Mahmoud Thabit Kombo ameuagiza uongozi wa Wilaya ya Kati na Mkoa wa Kusini Unguja kuwazuiya wananchi wawili walioanza ujenzi katika eneo hilo  na kuwataka  wavunje  nyumba hizo haraka iwezekanavyo.
Amesema iwapo  watashindwa kuvunja  majengo hayo  wao wenyewe Wizara itasimamia kuvunja nyumba hizo na  watalazimika kulipa gharama zote zitakazo .
Serikali  ya Mapinduzi ya Zanzibar imetenga eneo la ekari 80 katika kijiji cha Binguni  kwa ajili ya matumizi ya Wizara ya Afya  ambapo Wizara imeamua kulitumia kwa ajili ya kujenga Hospitali kubwa ya rufaa pamoja na  nyumba za wafanyakazi