ujenzi wa chuo cha tiba cha kimataifa utagharimu Dola za kimarekani Milioni 61

dar-es-salaam.

SERIKALI ya jamhuri ya muungano wa tanzania  imesema kuwa mradi wa ujenzi wa  Chuo cha Tiba  cha Kimataifa cha Muhimbili  eneo la Mloganzila nje kidogo ya mji wa Dar es salaam utagharimu Dola za kimarekani Milioni 61.

Katika mradi huo Tanzania imechangia dola za kimarekani milioni 18 serikali ya Jamhuri  ya Korea imetoa mkopo wa dola za kimarekani milioni 43 ili kufanikisha ujenzi wa chuo hicho katika eneo la Mlonganzila mjini Dar es Salaam.

Akizungumza  mara baada ya kukamilisha  ziara ya kukagua maendeleo ya ujenzi wa chuo hicho mjini Dar es salaam Waziri wa Elimu na Mafunzo ya Ufundi  Dkt.Shukuru Kawambwa  amesema kuwa mradi huo unatarajiwa kukamilika mwezi  Machi mwakani.

 Dkt. Kawambwa amesema kuwa mbali na ujenzi wa chuo hicho, serikali itajenga hospitali nyingine ya Muhimbili ambayo ujenzi wake utamalizika sambamba na ujenzi wa chuo hicho ili kuwawezeha wananchi kupata huduma bora za afya.

Amebainisha kuwa  hospitali hiyo  itakapokamilika itakuwa kubwa zaidi  na yenye vifaa vya kisasa  nakusaidia kupunguza msongamano wa wagonjwa uliopo katika hospitali ya Taifa Muhimbili pamoja na kuwasaidia wanafunzi kupata sehemu ya mafunzo kwa vitendo.

Kwa upande wake Makamu Mkuu wa Chuo cha Tiba Muhimbili Prof. Ephata  Kaaya  amesema kuwa mradi huo umegawanyika katika awamu mbili, awamu ya kwanza ikihusisha  ujenzi wa chuo cha tiba na Hospitali ya kisasa ya muhimbili na awamu ya pili  itakuwa ujenzi wa hospitali  kubwa ya kutibu magonjwa ya Moyo na mishipa ya fahamu.