Balozi Seif Ali Iddi amesema kuwa jukumu la Wazazi na Walezi Nchini bado litaendelea kubakia pale pale katika kuhakikisha kwamba wanasimamia vyema watoto wao kupata Elimu kadri ya uwezo wa watoto hao utakavyowaruhusu

Wilaya ya kaskazini b.

Mbunge wa Jimbo la Kitope Balozi Seif Ali Iddi amesema  kuwa  jukumu la Wazazi na Walezi  Nchini bado litaendelea kubakia pale pale katika kuhakikisha kwamba wanasimamia vyema watoto wao kupata Elimu kadri ya uwezo wa watoto hao utakavyowaruhusu.

Balozi Seif ambae pia ni Makamu wa Pili wa Rais wa Zanzibar alieleza hayo wakati wa hafla fupi ya kukabidhi vifaa mbali mbali vya ujenzi kwa ajili ya kuendeleza ujenzi wa jengo jipya la Skuli ya Msingi ya Kinduni iliyomo ndani ya Jimbo la Kitope Mkoa wa Kaskazini Unguja.

Amesema kuwa tabia ya kuwaharakisha watoto wao katika maisha yao hasusan wa kike kuwaozesha mapema wakufahamu kwamba wanawadumaza katika kupata wataalamu na viongozi bora wa hapo baadaye.

Vifaa hivyo  ambavyo ni pamoja na Matofali, Nondo, Saruji, Mchanga na Kokoto vitasaidia nguvu za Wananchi wa Kijiji cha Kinduni walioamua kukabiliana na ufinyu na nafasi za Madarasa kwa watoto wa Kijiji hicho na vile vya jirani.

Balozi Seif alisema kundi kubwa la watoto kwa kushirikiana na wazazi wao walioamua kutafuta elimu kwa njia zote ndilo litakalofanikiwa kukabiliana na changamoto ya mabadiliko ya Teknolojia katika karne ijayo.

Mbunge huyo wa Jimbo la Kitope amewapongeza Walimu wa Skuli ya Kinduni  kwa juhudi wanazochukuwa katika kuwapatia elimu wanafunzi wao na kufanikiwa kupasisha wanafunzi wengi waliyoipatia sifa skuli hiyo kushika nafasi ya Tatu Kitaifa kwa wanafunzi walioingia Mchepuo.

Akitoa Taarifa fupi ya Skuli ya Msingi Kinduni Mwalimu Mkuu wa Skuli hiyo Bibi Miza Omar Moh’d alisema mchango wa Mbunge wa Jimbo la Kitope kwa Skuli hiyo iliyoanzishwa mwaka 2009 unaendelea kuleta faraja kwa wazazi, walimu na wanafunzi wa skuli hiyo.

Mwalimu Miza alisema licha ya changamoto ya upungufu wa walimu, ukosefu wa huduma za maji safi na salama, maabara na Maktaba lakini lengo la  Kamati ya Uongozi ya Skuli hiyo ni kuona Kijiji cha Kinduni kinakuwa na Skuli ya Sekondari.