WAZANZIBAR WAMSOMEA HITMA SALMIN AWADHI

ZANZIBAR.

Waumini wa Dini ya Kiislamu, wajumbe wa Baraza la Wawakilishi, Viongozi wa Serikali Vyama vya  siasa pamoja na Wananchi, jana jioni walihudhuria Hitma ya kumuombea Dua aliyekuwa Mwakilishi wa Jimbo la Magomeni almarhoum Salmin Awadh Salmin.

Hitma hiyo ilyofanyika katika Msikiti wa Ijumaa wa Nur Muhammad Mtaa wa Mombasa kwa Mchina, iliongozwa na Imam wa Msikiti huo Sheikh Othman Maalim akisaidiwa na Naibu wake  Sheikh Jaffar Abdulla.

Makamu wa Pili wa Rais wa Zanzibar Balozi Seif Ali Iddi, Waziri Kiongozi Mstaafu Mh. Shamsi Vuai Nahodha, Naibu Katibu Mkuu wa CCM Zanzibar Vuai Ali Vuai na baadhi ya Mawaziri walijumuika na waumini hao katika hitma hiyo.

Mwakilishi huyo wa Jimbo la Magomeni alifariki Dunia Alhamisi  ya Tarehe 19/2/2015 baada ya kuugua ghafla akiwa katika Kikao cha kikazi cha chama hapo Afisi Kuu ya CCM Kisiwandui Mjini Zanzibar.

Marehemu Salmin Awadh Salmin alikuwa pia mnadhimu wa Chama cha Mapinduzi ndani ya Baraza la Wawakilishi,  ambapo kwa wadhifa huo umempa fursa ya kuwa Mjumbe wa Kamati Kuu ya Halmashauri Kuu ya Taifa ya Chama cha Mapinduzi.                                       

Mwenyekiti wa Baraza la Wawakilishi Zanzibar ambae pia ni Mjumbe wa Baraza hilo Jimbo la Kikwajuni Mh. Mahmoud Mohammed Muussa, kwa niaba ya Wajumbe wa Baraza la Wawakilishi pamoja na Familia ya Marehemu Salmin Awadh amewashukuru watu wote  waliochangia kufanikisha mazishi ya Kiongozi huyo.

Marehemu Salim Awadh Salmin aliyezaliwa Tarehe 6 June Mwaka 1958 na kuzikwa Kijiji kwao Makunduchi Mkoa wa Kusini Unguja ameacha Kizuka na watoto wanane.

Mwenyezi Mungu amlaze mahala pema peponi amin.