NYUMBA ZILIZOJENGWA KWENYE VIANZIO VYA MAJI KUBOMOLEWA

ZANZIBAR.

MAKAMO WA PILI WA RAIS WA ZANZIBAR BALOZI SEIF ALI IDDI AMEUAGIZA UONGOZI WA HALMASHAURI YA WILAYA YA MAGHARIBI PAMOJA NA TAASISI ZINAZOSIMAMIA MASUALA YA UJENZI KUHAKIKISHA KWAMBA NYUMBA ZILIZOJENGWA  NA ZINAZOENDELEA KUJENGWA KATIKA VIANZIO VYA MAJI VYA DOLE ZINAVUNJWA HARAKA IWEZEKANAVYO.

BALOZI SEIF AMETOA AGIZO HILO WAKATI ALIPOFANYA ZIARA FUPI YA KUKAGUA ENEO LA MSITU WA KIMAUMBILE LILIOPO MASINGINI DOLE PAMOJA NA LILE YA VIANZIO VYA MAJI DOLE LINALOONEKANA KUANZA KUVAMIWA KWA UJENZI WA NYUMBA LICHA YA AMRI ILIYOWAHI KUTOLEWA NA MAMLAKA YA MAJI ZANZIBAR { ZAWA } YA KUZUIA UJENZI HUO.

AMESEMA KUWA  HATUA HIYO YA SERIKALI IMEKUJA KUZINGATIA  UHARIBIFU UNAOONEKANA KUENDELEA KUFANYWA KATIKA VIANZIO VYA MAJI JAMBO AMBALO NI HATARI KWA UCHAFUZI WA MAZINGIRA SAMBAMBA NA AFYA ZA WANANCHI.

AMESEMA KUWA UONGOZI WA HALMASHAURI HIYO LAZIMA UFANYE UTARATIBU WA KUWAHAMISHA WATU WOTE WALIOJENGA KATIKA VIANZIO HIVYO VYA MAJI ILI KUENDELEA KUHESHIMU IPASAVYO MAENEO HAYO MUHIMU KWA USTAWI WA JAMII.

MAKAMU WA PILI WA RAIS WA ZANZIBAR ALIELEZA KWAMBA WATAALAMU WA KILIMO NA MAZINGIRA WANARUHUSU MAENEO YA VIANZIO VYA MAJI KUTUMIKA KWA KILIMO CHA AINA MBALI MBALI KUTOKANA NA KUTOCHAFUA NAKUHATARISHA  MAZINGIRA YA VIANZIO HIVYO.

MAPEMA SHEHA WA SHEHIA YA DOLE BWANA IBRAHIM SHAABAN OTHMAN ALIMUELEZA MAKAMU WA PILI WA RAIS WA ZANZIBAR KWAMBA MAMLAKA YA MAJI ZANZIBAR { ZAWA } ILIWAHI KUWEKA  MABANGO YA MATANGAZO KUJARIBU  KUSIMAMISHA UJENZI WA AINA YOYOTE KWENYE ENEO HILO.

HATA HIVYO SHEHA IBRAHIMU AMESEMA KUWA HARAKATI ZA UJENZI  WA NYUMBA HIZO  ZILIZOPO MITA CHACHE KUTOKA KWENYE KISIMA HICHO CHA DOLE ZILIENDELEA HUKU NYENGINE ZIKIWA KATIKA HATUA YA KUKAMILIKA.