RAIS GAUCK AENDELEA NA ZIARA ZAKE ZANZIBAR KATIKA KUKAMILISHA SIKU 6 TZ

Zanzibar. 

Rais wa Zanzibar Dk Ali Mohamed Shein amesema kuwa  ziara ya Rais wa Shirikisho la Jamhuri ya Ujerumani  nchini Joachim Gauck ni fursa nyengine muhimu ya kuimarisha uhusiano na ushirikiano uliopo kati ya Zanzibar na Ujerumani.

Akizungumza na Rais huyo Ikulu mjini zanzibar Dk. Shein amesema kuwa historia inaonesha kuwa uhusiano kati ya Zanzibar na Ujerumani ulioanza mwaka 1847 ikiwa nchi ya tatu baada ya Marekani na Uingereza kuanzisha mahusiano na Zanzibar.

aidha dr shein Alitumia fursa hiyo kuishukuru Serikali ya Shirikisho la Jamhuri ya Ujerumani kwa misaada yake mbali mbali kuunga mkono jitihada za wananchi za kujiletea maendeleo.

Kwa upande wake Rais wa Shirikisho la Jamhuri ya Ujerumani Joachim Gauck alimueleza Dk. Shein kuwa amefurahi kuona Zanzibar ni nchi yenye kukusanya watu wa tamaduni nyingi pamoja na dini tofauti lakini wameweza kuishi kwa amani na mashirikiano makubwa.

Rais huyo alieleza kuwa wananchi wa Ujerumani wanafahamu uhusiano wa kihistoria uliopo kati ya nchi yao na Zanzibar na kwamba amekuja hapa kuangalia namna nchi hiyo inavyoweza kuimarisha zaidi uhusiano huo.

Gauck amesema kuwa watu wa Ujerumani wamekuwa wakipata taswira nzuri ya Zanzibar kutokana na watalii wanaotembelea Zanzibar na Tanzania mara kwa mara.

Kuhusu hali ya kisiasa nchini Rais Joachim Gauck alisema kuwa  amefurahi kuona wananchi wa Tanzania kuwa  ni watu wanaowasiliana na kujadiliana mambo yao bila ya ugomvi  na hilo ni jambo kubwa kwa maendeleo ya demokrasia.

Amesisitiza kuwa nchi yake itaendelea kushirikiana na Zanzibar na Jamhuri ya Muungano wa Tanzania kwa jumla ili kuuenzi na kuimarisha uhusiano na ushirikiano huo.

Rais huyo aliwasili leo mchana kwa boti ya Kilimanjaro 4 inayomilikiwa na Kampuni ya Azam Marine na kupokelewa katika bandari ya Malindi Zanzibar na viongozi mbali mbali wakiongozwa na Rais wa Zanzibar na Mwenyekiti wa Baraza la Mapinduzi Dk. Ali Mohamed Shein.

Rais Joachim alipewa heshima zote kwa kupigiwa mizinga, na kukagua gwaride maalum lililoandaliwa na Jeshi la Wananchi wa Tanzania –JWTZ.