WANAFUNZI WA SKULI ZA SEKONDARI WANAOSOMA MASOMO YA SAYANSI NA WALIMU WAO TANZANIA WAMESISITIZWA KUONGEZA JUHUDI KATIKA MASOMO YAO

ZANZIBAR.

WANAFUNZI  WA SKULI ZA SEKONDARI WANAOSOMA MASOMO YA SAYANSI NA WALIMU WAO TANZANIA WAMESISITIZWA KUONGEZA JUHUDI KATIKA  MASOMO YAO  NA KUFANYA TAFITI ZITAKAZOSAIDIA KUGUNDUA MATATIZO YA AFYA YANAYOIKABILI NCHI HIVI SASA IKIWEMO MARADHI YA KENSA.

RAIS WA JUMUIYA YA WATAALAMU WA FANI MBALI MBALI ZA AFYA ZANZIBAR (BLUE HEALTH ORGANISATION) GORA FAKI HAJI AMETOA USHAURI HUO KATIKA SEMINA YA  KUELIMISHA TATIZO LA MARADHI YA KENSA ILIYOWASHIRIKISHA BAADHI YA WANAFUNZI WA  MASOMO YA SAYANSI WA SKULI ZA SEKONDARI KATIKA SKULI YA HAILESSELASSIE.

AMEWAELEZA WANAFUNZI HAO KWAMBA  KENSA NI MIONGONI MWA MARADHI HATARI YANAYOSUMBUA WANANCHI WENGI TANZANIA NA IDADI KUBWA YA WATU WANAOPATA MARADHI HAYO HUPOTEZA MAISHA.

RAIS  HUYO WA BLUE HEALTH ORGANISATION AMEONGEZA KUWA ASILIMIA 66 YA WAGONJWA WA KENSA  WALIOFIKA  OCEAN ROAD  KUPATIWA MATIBABU NI WANAWAKE NA ASILIMIA 24 WANAUME NA HIYO INAONYESHA WANAWAKE  WANASUMBULIWA ZAIDI NA MARADHI HAYO.

AMESEMA  KUWA PAMOJA NA KUWA HAKUNA SABABU  RASMI INAYOPELEKEA  KUPATA KENSA MOJA KWA MOJA LAKINI AMESEMA MATUMIZI YA BIDHAA ZINAZOTOKANA NA TUMBAKU, UTUMIAJI WA POMBE NA MPANGALIO USIORIDHISHA WA CHAKULA UNACHANGIA KUPATA TATIZO LA MARADHI HAYO.

AMEWATAKA WANANCHI KUJIEPUSHA NA VIASHIRIA  VINAVYOWEZA KUPELEKEA KUPATA KENSA NA KUWA NA UTARATIBU MZURI WA CHAKULA IKIWEMO KUTUMIA ZAIDI MATUNDA NA  MBOGA ZA MAJANI.

AMEWASHAURI WATU KUJENGA TABIA YA KUFANYA UCHUNGUZI WA AFYA ZAO MARA KWA MARA NA KUWA NA  TAHADHARI  WANAPOPATA TATIZO LA UVIMBE KATIKA MIILI YAO.

AMEWAHAKIKISHIA WANANCHI  KUWA BLUE HEALTH ORGANISATION ITAENDELEZA LENGO LA KUTOA TAALUMA  YA MASUALA YA AFYA KWA MAKUNDI MBALI MBALI  ILI WAWEZE KUFAHAMU SABABU ZINAZOPELEKEA MARADHI NA NJIA ZA KUJIEPUSHA NAYO.

SEMINA HIYO ILIWASHIRIKISHA WANAFUNZI WA SKULI ZA SEKONDARI LUMUMBA, BENBELLA, HAMAMNI NA BAADHI YA WALIMU WA SKULI HIZO WANAOSOMESHA MASOMO YA SAYANSI.